Become a Contributing member of our community

Contribute A Dua

    All Duas in Hindi

  • Ae hamare pyare Allah, jis tarah tu ne dunya mein hamare gunaho par parda daal diya, Isi tarah Akhirat mein bhi hamare gunaho par parda daal dena.
  • Ya Allah aap Rahman ho, aap Raheem ho. Ek maa apne bachhe se jitna pyaar karti hai, usse kai guna zyada pyaar aap apne bando se karte ho. Ek maa apne bigde hue bachhe ko seene se laga kar uski buraiyo pe parda dal deti hai, ussi tarah, aap hum sab ki buraiyo pe parda daal kar hum par rahmat barsa aur hum sab ke gunaho ko maaf farma.
  • Ya Allah, zindagi ka bohot bada hissa teri nafarmani mein guzr gaya, Ae Allah agar hum isse pehle mar jaate to yaqeenan aap ki pakar mein hote, sakhti mein hote, azaab mein hote, Ya Allah yeh teri rahmat ne na hone diya, tu ne itne mawqe diye ke hum tere saamne hamare gunaho ki maafi maang sake, Ya Allah agar tu ne hamein dhutkar diya to kon hamein panaah dega, Ya Allah koi nahi hein, Ae mere maalik hamare tamaam gunaho ko maaf Farma.
  • Ya Allah, Humare gunaho ko maaf farma, Din ke ujaale mein, raat ke andhere mein, kai gunah jaan ke kiye, kai gunah anjaane mein kiye, wo sab gunaho ko maaf farma.
  • Ya Allah, humare maa baap ne zindagi bhar takleef utha kar humein bada kiya hai. Unki jitni bhi khidmat hum kar lein, kabhi bhi unka badla hum chuka nahi payenge. Ye jo aaram wali zindagi humein aaj mili hai, wo sab unki qurbaniyon ke badolat mili hai. Hum dua karte hai ki humare maa baap ko jannat ul firdaus naseeb ho. Ya Allah humare maa baap ko jahannam se bacha kar jannat naseeb farmana.
  • Ae Allah hamare maa baap ke jaan, maal, izzat, aabru, zindagi aur Iman mein khoob barkat Ata farma, ae Allah un ke ilm aur amal mein taraqqi Naseeb farma, aur un ki Qadar daani Naseeb farma.
  • Ya Allah, humare maa baap ko tandurusti ataa farma. Humein unki khidmat karne ki taufeek ataa farma. Maut ke aane tak humare maa baap ko kisi baat ki takleef na ho. Na bimari ki takleef jo jism mein dard pohonchaye aur na dil ki takleef jo kisi ki baaton se pohonche. Unhein hamesha khush rakhna aur humein unki khushiyon ki wajah banana.
  • Ya Allah, humein Quran ki tilaawat karne ki taufik ataa farma. Quran e paak ki qadr karne wala bana de. Jo kitaab apne humare deen ko mukammal banane ke liye naazil kiya tha, usko humnein kabhi padh kar aur samajh kar apni zindagi mein utaarne ki koshish nahi ki. Ya Allah, humein Quran e paak ko maine ke saath padh kar, samajh kar, siraatun mustakeem pe chalne wala bana de.
  • Ya Allah, Aaj humari ummat badi pareshaan hai, zulm se ghiri hui hai, na-insaafi ka shikaar bani hui hai, musibaton se jhujh rahi hai. Lekin in sab takleefon se badi ek takleef hai jo unhein mayoos kar rahi hai aur wo hai na ummeedi. Jab ek mazloom ki ummeed toot jaati hai tab uska koi sahara baki nahi rehta. Ya Allah, na ummeedi mein ummeed dikhana wale aap ho, Na mumkin ko mumkin karne wale aap ho, Mazloom ko sahara dene wale aap ho, Mayoosi ko door karne wale aap ho. Takleef se guzar rahe in tamaam logo ki awaaz sunne wale aap ho. Khaliq bhi aap ho aur Maalik bhi aap ho. Ya Allah, in musibaton se pareshaan logo ki pareshaaniyon ko door farma. Aansuon se bhari in mayoos aankhon mein khushiyan naseeb farma.
  • Ya Allah, aainda jitni zindagi hein, yeh to tu hi Jaanta hein, Ae Allah zindagi ke jitne ayyaam baaqi hein, jitne saal baaqi hein, ae Allah zindagi ke un ayyaam ko apni razamandi wale kaam mein, aur apne Deen mein kharach karne ki tawfeeq Ata farma, ae Allah apne pasandeeda kaamo mein guzaarne ki tawfeeq Ata farma, ae Allah in pasandeeda kaam ko karna hamare liye aasaan karde, in naik kaamo ko karna hamari tabiyat bana de.
  • Ya Allah, ye Ramadan ke mahine ke liye hum bohot shukr guzaar hai. Humare kai saathi aur rishtedaar jo pichle Ramadan mein humare saath the aaj wo qabr mein lete hue hai. Lekin humein ek aur Ramadan naseeb hua hai, isse gaflat mein guzar ne nahi dena. Ho sakta hai ye humari zindagi ka bhi aakhri Ramadan ho, is mahine ki ahmiyat humare dilon mein daal de aur is mahine ki qadr karne wala banade. Is mahine ka beintehan fayda uthane ki aur neki karne ki taufeeq ataa farma.
  • Ya Allah, hum sabko tandurusti ataa farma. Ye dunya ki daulat, ye dunya ki shaurat, ye aaram, ye makaan aur puri duniya ke aish o aaram kuch bhi nahi hai agar tandurusti na ho. Ya Allah, jitni zindagi aapne humare liye likhi hai utni zindagi tandurusti ke saath guzre. Humare gharwalo ko, ya kisi aur ko takleef de aisi bimari se bachana. Ya Allah, maut tak humein kisi ka mohtaaj na banana.
  • Ya Allah, hum gunehgaar hai, bohot sare gunah anjaane mein kar baithte hai, aur kayi gunah jaan kar bhi karte hai. Humare gunah itne bade hai ki maafi ke layak bhi nahi hai, lekin in bade gunaho ke aage Ya Allah aapki rehmat kai guna badi hai. Ya Rahman, aapki rehmat ke aage humare gunaho ko chota samajh kar unhein maaf farma.
  • Ya Allah, hum sab ki rozi mein barkat ata farmaa. Jo tune dia wo teri Niamat, Jo tune na dia wo teri Hiqmat, Aur jo tune dekar le liya wo humara 'Imtehaan'. Ya Allah humein har haal mein tera shukar ada karne ki taufeeq ata farma.
  • Ya Allah, tu ne Quran mein farmaya ke tu har gunah ko maaf karta hein, chota ho ya bara, Ya Allah, is Ayat ke zel mein ham sab gunehgaro ki maghfirat farma.
  • Ya Allah, maafi chahte hai un gunah ke liye jo hum karte hai, aur wo gunah ke liye jise gunah samajhte bhi nahi. Hum bohot kamzor aur chhote hai, lekin humare gunah bohot bade hai. Is mubarak mahine ki barkat se humari ye guzarish ko puri farma. Humare sagira aur qabira gunahon ko maaf farma.
  • Ya Allah, humein jahannam ki aag se bachana. Ye dunya ki garmi, ye dunya ki aag humse bardaasth nahi hoti, to jahannam ki aag kaise bardaasth kar payenge hum. Humein jahannam ki aag se panah dekar hum sabko jannat naseeb karna.
  • Ya Allah, Jo musalmaan bhai aur behan nikah ki umar ke ho gaye hai, unke nikah ko mukammal farma. Jo unki aankhon ki thandak bane aur ek doosre ko aapke aur deen ke kareeb kare aise paak rishte ko qubool farma. Halaal rishte ke saath halaal rozi ka zariya naseeb farma.
  • Ya Allah, hamare dost aur ahbab jo hamare sath kandhe se kandha mila kar namazon mein haazir hote the, aaj wo mann aur mitti ki chaadar taan kar qabr mein so gaye, Ya Allah koi nahi hein un ke ird gird, Ya Allah hum un ke liye dua karte hein, hamari duao ko un ka sathi bana kar hashr tak un ke sath shaamil rakhna aur un ki qabr ko Jannat ke baagho mein se ek baagh bana dena.
  • Ya Allah, duniya mein kayi Musalmaan bhai, behne aur bachhe pareshaan hai. Unka koi madad karne wala nahi hai. Koi unke aansoo pochne wala nahi hai. Koi unhe sahara dene wala nahi hai. Hum madad karna chahte hue bhi unki sahi tarah se madad nahi kar pa rahe hai. Aisi haalat mein sirf aap hi ho jo un pareshaan logon ki hifaazat kar sakte ho. Ya Allah takleef se pareshaan musalmano ki takleef ko door farma.
  • Ya Allah, Qayamat ke din humein zaleel na karna. Hum itne bade gunehgaar hai ki agar humare gunah duniya ke saamne aa jaye to hum kisi ko apna chehra nahi dikha payenge. Lekin jaise aapne zindagi bhar humare gunaho pe parda kiya hai, ussi tarah humare gunah ko maut se pehle maaf farmana, aur humein Qayamat ke din ruswai se bachana.
  • Ae Allah Shariat ka har kaam karna hamare liye asaan farma de, Ae Allah jis tarah bhook lagti hein hum khaa lete hein, pyaas lagti hein hum pee le te hein, neend aati hein so jaate hein, isi tarah hamare liye Shariat ka har kaam asaan kar de, aur Jin kaamo se tu naaraaz hota hein, un kaamo se hamein mukammal tor par ihtiraaz Naseeb farma, aur ae Allah kabhi nafs aur shaytaan ke dhoke mein aa kar tujhe naaraaz kar bethe to ae Allah hum par nazr rahmat kar ke phir taubah ki tawfeeq Naseeb kar dena